Pijos

A conta desa declaración de Ana Mato (“os nenos andaluces son prácticamente analfabetos”) da que unha amiga profesora de Sevilla di que entende o escándalo porque sobroulle o de “prácticamente”, coñezo por outro amigo unha confesión estupenda. Ana Mato, polo visto, é a autora da frase máis pija da Historia de España. Foi feita hai uns anos, cando á pregunta de cal era o seu momento preferido do día, ela respondeu: “El mejor momento es por la mañana, cuando veo cómo visten a mis niños”. Sobre os pijos eu sempre lembrarei aquilo que contou unha vez Francisco Umbral. Estaba o escritor falando nun salón con Adolfo Suárez, e baixou as escaleiras da casa o seu fillo Adolfito vestido de tal maneira, tan tremendamente pijo, que o pai púxose colorado e mandouno arriba a cambiarse. Agora Aznar, por exemplo, anda facendo campaña cun xersey rosa de pico que lle queda formidable coa meleniña que deixou en homenaxe e Baudelaire. Pero a gran xeración pija hai que buscala na camada de Julio Iglesias. Aínda lembro a xogada que un guionista da Sexta lle fixo a Julio José Iglesias Preysler a conta dun concurso de monólogos. Moi metido no papel, saíu ao escenario Julio José, estendeu os brazos e dixo, nese típico inicio monologuista: “¿Conocéis vosotros a alguien no haya tenido problemas para encontrar un piso?”.